紅魔星光閃爆伊奧維

猪拉多纳

聯賽盃領過嘢 遇弱照擺強陣

心水清嘅球迷應該仲記得，依家喺英超積分榜排緊第3嘅曼聯，季初喺聯賽盃慘吞甲組仔米爾頓凱恩斯4蛋，樣衰出局，今晚英足盃第3圈作客另一甲組仔伊奧維前，紅魔領隊尹戈爾專登摷番呢場羞家到極嘅賽事嚟講，就係要班「魔兵」引以為鑑，咪再重複犯錯！尹帥落晒Order，「魔兵」當然唔敢放鬆，1.58倍讓球客勝係熱咗啲，但最緊要中吖嘛！

（now 621、633及660周日晚11時30分直播）
力爭重溫11年舊夢

曼聯曾喺11至12月期間連贏6場英超，球隊上上下下皆豪言佢哋有力爭冠，點知呢啲嘢好邪，講完之後紅魔近4場只係贏得1場，落後車路士同曼城9分，領隊尹戈爾即刻舉白旗。話晒曼聯都係傳統勁旅，上季嘅「莫耶斯之亂」已經搞到紅魔擁躉勁down，今季初嚟埗到嘅尹帥當然要對佢哋有個交代，既然爭英超機會渺茫，咁今季想捧盃冧番粉絲就只剩番英足盃，而且紅魔對上一次贏英足盃已經係11年前，自然好想重溫舊夢。

曼聯季初喺英聯盃大敗於米爾頓凱恩斯腳下，有部分原因係尹戈爾低估咗對手，派小將應戰，今場面對排喺英甲包尾、實力比米爾頓凱恩斯更渣嘅伊奧維，尹帥賽前講明要抱住「不成功便成仁」嘅心態，要求球員認真去踢，睇嚟尹帥好大機會派強陣應戰，隊長朗尼、「老虎」法卡奧同桑馬達3大攻擊主力齊齊正選，火力唔使懷疑，一場大勝應手到拿來。
英甲包尾冇資格爆冷

雖然話英足盃係爆冷溫床，不過科娜實在睇唔到伊奧維有爆冷嘅可能性，呢隊波今季由英冠降到英甲，衰開有條路，依家更排喺積分榜包尾，認真濕滯。難得喺英足盃主場撞正鼎鼎大名嘅曼聯，咪當係Bonus囉，即使輸波都可以賺番筆，依家首要目標都係護級，費事兩年降兩班咁肉酸，今場真係無謂阻住地球轉，熱捧讓球客勝！