高路高路搶新季首W

猪拉多纳

智甲秋 5:30（日）36 高路高路 Vs 聖馬高斯

聽朝智甲將會上演「主場入球王」鬥「作客蟲」戲碼，由春季聯賽主場場均入波最多嘅高路高路，主場迎戰上季作客未贏過嘅聖馬高斯。前者身為智甲班霸，喺新一季梗要做齣好戲為爭標打好基礎，第一炮邊可以失威，1.62倍「讓主」抵玩。

貴為攞到最多次智甲聯賽冠軍嘅球隊，相信高路高路已經磨拳擦掌準備好喺新季大展拳腳。事實上佢哋主場火力夠猛，上季8次主場出擊攻入18球，就連另一勁旅智利大學嚟到都要吞2蛋而回，足以證明佢哋喺主場嘅表現堅信得過。
聖馬高斯作客未贏過

另邊廂聖馬高斯作客極易腳軟，睇番佢哋喺春季聯賽作客成績勁曳，8場比賽錄得1和7負之餘，仲要入得3球咁大把，尤其新帥華加拉啱啱上任未摸熟隊波，睇怕今場都係輸少當贏。