博皇馬新年大勝開齋

猪拉多纳

迎擊愛奴誓洗3連敗頹風

上年年尾齊齊去杜拜掘金踢表演賽嘅西意豪門皇家馬德里同AC米蘭，打完呢個白鴿轉之後，踏入2015年都未好過，今日分途喺各自聯賽出擊，都希望一洗頹風，喺新一年打開勝利之門。

皇馬為賺油錢去杜拜，除咗畀AC米蘭擊敗，仲無喇喇斷咗度氣，搞到新一年遭逢兩連敗，分別喺西甲同西班牙盃輸畀華倫西亞同馬德里體育會，堂堂「銀河艦隊」狂輸波，堅係好冇面囉！今晚皇馬返到主場迎戰愛斯賓奴，誓要搵對手嚟出氣，喺新一年開齋，今場皇馬「-2」都照捧！

（now 632周六晚11時直播）
C朗捧金球獎前要攞威

皇馬畀AC斷咗22連勝不特止，仲要連輸3場，今場非勝不可下，預料會搵王牌C朗拿度復任正選，呢位巨星不嬲都勁好勝，梗係唔能夠接受自己隊波輸咗咁多場，而且過幾日就係金球獎頒獎禮，身為大熱嘅C朗當然要用表現嚟向全世界證明佢得獎係實至名歸，帶領狀態稍為回落嘅皇馬重上勝軌，等批評佢嘅人收聲！

其實皇馬三連敗當中兩場係輸輕敵，喺杜拜輸畀AC係因為表演賽關係，派上大批副選落場下輸2比4，跟住喺西甲作客華倫反勝為敗，連輸兩場，度氣被打斷，而上場西班牙盃不敵馬體會就因為畀對手嘅瘋狂逼搶踢法食住，今場對愛斯賓奴，一來唔敢再輕敵，二來愛斯賓奴踢法亦唔似得馬體會咁逼搶，作客更係例牌腳軟，連死敵巴塞隆拿喺主場都贏到佢哋5比1，皇馬又點可以唔大勝一場呀？一於捧讓球主勝喇！