曼城變種殺手 血洗愛華頓

猪拉多纳

No Yaya？ No Problem！

No Yaya？No Problem！衞冕英超冠軍曼城，經歷快車檔期後終於追到「車」，唔想再次被放甩，嚟緊每場波都唔可以掉以輕心。雖然出爐非洲足球先生耶耶托尼要出戰非國盃，好在「變種米拿」占士米拿呢期腳風勁順，加埋阿古路已經復操可以候命，造訪頹兵愛華頓可以秤先，一於捧1.75倍客勝。

曼城家陣追到同車路士同分，連得失球差都係一樣，「雙藍」爭霸戰真係鬥得超激。「藍月亮」近12場波贏咗11場，期間領隊比歷連尼喺大傷「鋒」嘅情況下，將占士米拿打造成「變種殺手」，估唔到呢招堅使得，就係佢上仗梅開二度，帶領曼城喺足總盃第3圈反勝錫周三晉級。
阿古路復操 隨時落場

唔少人都擔心究竟耶耶托尼去咗踢非國盃，曼城未來1個月仲掂唔掂，呢位靈魂人物尋日追平伊度奧嘅紀錄，力壓奧巴美揚連續4年當選非洲足球先生，佢對曼城有幾重要毋庸置疑。但查實Yaya今季演出明顯跌Watt，比歷連尼搵防守力更強嘅費蘭甸奴夥拍費蘭度法蘭斯高鎮守中場，反而令防線冇咁大壓力，屆時薩巴列達同基捷基治就可以放心上前助攻。

最重要嘅係，自從12月頭傷膝就一直缺陣嘅阿古路已經復操，《曼徹斯特晚報》話「阿Kun」今晚有機會後備落場，同高柏尼、迪斯高一齊復出，有埋呢位攻入14個英超「士哥」嘅射手衝鋒陷陣，「拖肥糖」今晚都咪話唔危。
愛華頓頹爆 快車檔期輸晒

睇小愛華頓，皆因佢哋近況堅曳，快車檔輸晒不特止，今季20輪聯賽過後仲勁失33球，最濕滯係門神侯活仲養緊傷，消息話佢要抖成6個禮拜，後防冇個靠得住，點抵擋「藍月亮」嘅進襲呀？
Data King：馬天尼斯鬥曼城例衰

‧「藍月亮」連續13仗不敗。

‧曼城中場大衞施華近6場英超入5球。

‧「拖肥糖」領隊馬天尼斯11次英超領軍鬥曼城，錄得1和10負。
乜都玩錦囊：博藍月亮由頭贏到尾

愛華頓今季英超主場防守好唔掂，至今失咗15球，淨係少過踢多1場嘅西布朗，呢鋪仲要冇埋門將侯活，勁大鑊！「藍月亮」盛傳引入韋菲特邦尼，點到鋒將祖維迪唔搏命？睇番「拖肥糖」上季咁勇2鬥曼城半全場都輸晒，佢哋依家頹成咁，更加冇得打，追多鋪2.65倍「客客」。
盤路解碼

曼城今季英超10場作客贏7場，勝率達70%。