沙特騰雞 中國抵博

猪拉多纳

北韓牌面夠「克」敵

亞洲人賭歐洲或美洲波，經常有「隔山買牛」情況出現，唔敢話亞洲冇高手，但作為亞洲人，就應該向番亞洲波埋手，今日樂比同大家研究B組兩場亞洲盃，烏茲別克對北韓（now672台周六下午3:00直播），同埋沙特阿拉伯對中國（now672台周六下午5:00直播），兩場都捧「讓球客勝」。
北韓射手鄭大世無入選

先講吓烏茲別克對北韓，兩隊波近年經常同港隊交手，亦曾被守和，睇得出兩隊嘅同一通病係入球把握力不足。今場烏茲別克要讓波，全因北韓少踢國際賽，所以世界排名較低。論實力嚟計，其實兩隊五五波，雖然北韓星級前鋒鄭大世冇入選，但喺瑞士超搵食嘅前鋒朴光龍，近年冒起得甚快，絕對係亞洲頂級射手，而李明國、車正赫都有出戰世界盃決賽周經驗，論牌面北韓一啲都唔輸蝕，預計首場分組賽兩隊踢法會非常保守，半場和、入球細都可以考慮。
沙特主將壓力大患情緒病

至於緊隨開波嘅沙特阿拉伯對中國，樂比認為中國可保持不敗，雖然近十年嘅國際賽嘅成績慘不忍賭，但今日支持佢哋主要有三個原因。

首先沙特近年足球水平直線滑落。曾經係3屆亞洲盃冠軍嘅佢哋，喺上屆世界盃外圍賽連十強賽入唔到，上屆亞洲盃更3戰3敗包尾出局。更重要嘅係沙特《中東報》（小圖）報道，佢哋個頭號攻擊球員艾森拉尼聲稱有傷幾日冇練波，但實情係心理壓力太大引發情緒病，可能被剔出大軍名單，一個2014亞洲足球先生都騰雞成咁，沙特點撐得落手呀？

其次係沙特內部問題，近10年佢哋先後用過11位領隊，上月先上任嘅主帥Cosmin Olaroiu，只係借用形式執教，佢領軍嘅兩場熱身賽都輸波，足總正物色領隊於亞洲盃後接任，喺咁嘅情況下實在難交出成績。

最後係中國喺比連執教後，表現有明顯改善，熱身賽已保持10場不敗，雖然對手唔算強，部分對手亦唔係派出最強陣出戰，但總算有所進步，況且比連選人以態為先，連表現欠佳嘅大牌球員馮瀟霆亦落選，係另一種進步，所以決定向中國投信心一票。

亞洲盃B組
樂比推介

中國（讓球客勝）、北韓（讓球客勝、半場和、入球細）