皇馬「讓球和」愛得過

猪拉多纳

新年主場爭響頭炮

皇家馬德里拎咗個世界冠軍銜頭之後，返到西班牙連食兩記敗仗，但今晚喺西甲頭場迎戰愛斯賓奴，話晒係佢哋新一年首次主場出擊，相信要攞足3分唔難，但由於征戰頻繁，下星期要再鬥馬體會踢西盃翻身戰，估計今場小勝機會高，皇馬讓兩球，不妨冷敲4.7倍「讓球和」。

（now632台周六晚11:00直播）
留力西盃未必大炒愛斯賓奴

「銀河艦隊」新年首戰作客華倫西亞先勝後敗，22場連勝紀錄告終，教練安察洛堤賽後炮轟球員態度有問題，又話「大聖爺」加里夫巴利踢法獨食，最弊係後衞比比同門將卡斯拿斯喺失波後仲互相指摘，老實講士氣點會好，日前喺西班牙盃16強首回合不敵馬體會，簡直係雪上加霜。

之但係講到球員質素嘅話，皇馬毫無疑問贏晒愛斯賓奴，其中日前喺西盃打後備嘅C朗拿度，今場預計擔正搏殺，火力夠晒保證，不過佢哋為收復西盃首回合失地，教練安察洛堤今場隨時見好就收，未必能夠大炒贏波。況且愛斯賓奴雖然同皇馬一樣，喺新一年經歷兩連敗，但呢支西甲中游分子兩場都僅敗而回，相信今晚造訪巴拿貝未必不堪一擊。