意甲Big 4獸鬥

猪拉多纳

今晚意甲前四大混戰，好戲連場！榜首祖雲達斯連番失分，畀羅馬追到只差1分，今晚祖記作客排第四嘅拿玻里，形勢危危乎，隨時連榜首位置都輸埋；至於二哥羅馬掛名主場同「三弟」拉素演首都打吡，兩隊交鋒向來擦出火花，今晚前四大亂鬥，直接影響意甲爭標形勢！
羅馬拉素大激戰

「二哥」羅馬現時僅落後祖雲達斯1分，如果今仗贏波，對方又失分嘅話，就可搶走榜首位置，球員爭勝鬥心肯定強。但拉素狀態正值巔峰，「進攻鐵三角」菲臘佐積域、菲臘安達臣、莫利擦出火花狂數胡。即使拉素爭標機會微亦唔會放過同市死敵，鬥攻格局要入球大。

（TVB 301周日晚10時直播）

羅馬今季一直追得祖記好貼，絕對係重奪失落咗14年意甲錦標好時機。「雌狼」整體戰出色，前中後三線都識入波，3位中場拿積、尼恩高蘭、比真歷今季共攻入12球，比鋒線球員更多，就算前鋒謝雲奴、中場施度基達離隊踢非國盃，對進攻影響唔大。適逢祖記硬撼拿玻里，好可能會失分，正係羅馬奪取榜首良機，應會更進取求勝。
拉素鐵三角瘋狂數胡

拉素雖然落後羅馬9分，但狀態比對方有過之而無不及，近4場意甲獲3勝1和攻入10球，包括上仗大勝另一前列球隊森多利亞3比0。中場菲臘安達臣近4仗入3球，射手菲臘佐積域今季已有7球進帳，加上入咗6球嘅莫利，呢個進攻組合絕對唔嘢小。打吡戰面子攸關，就算贏唔到，都希望入波攞番個彩。
祖記頹勢難讓玻

祖雲達斯自上月初開始陷低潮，近6仗僅1勝冇晒霸氣，加上早前輸咗意超盃畀拿玻里，再交鋒未踢先輸氣勢。拿玻里回勇，有近9次主場對祖雲達斯未嘗1敗嘅靚績支持，受讓平半下盤抵玩。

（TVB 301周一凌晨3時45分直播）
「肥賓」季尾鬆人爭籌碼

無可否認拿玻里今季成績退步，並傳出會方想炒教練賓尼迪斯，但消息反而刺激「肥賓」及球隊大踢爭氣波，歇冬後首仗大炒切塞納4比1，荷西卡利祖、希古恩、咸錫都有波入。荷、希二人都係由賓帥一手引入，「老細」有難自然特別落力護主。近日有傳賓尼迪斯今季結束後可能離隊，當然希望以「勝利者」姿態走人，既可令會方後悔，亦可提升個人籌碼爭取投大球會。

祖雲達斯今季由阿里基執教，防線唔及以往穩陣，近3場聯賽有兩場領先下被對手逼和，上仗主場對國米如非對手前鋒莫路伊卡迪獨食，可能已被絕殺，今仗仲要作客遇上實力更強嘅拿玻里，肯定難踢。事實上「北方霸主」祖記南征成績麻麻，過去9次作客拿玻里僅4和5負，即使干地領軍時嘅盛世時期作客都搞唔掂對手，更何況現時處於頹勢，讓平半寧揀下盤。