日本3.8倍讓和仲和味

猪拉多纳

巴勒斯坦打波當打仗

今日日本對巴勒斯坦場亞洲盃D組開鑼戰，唔使問大部分球迷都預期「藍武士」大炒一場，但係巴勒斯坦係咪弱到任砌嘅呢？恐怕未必，況且日本要讓到成兩球，個3.8倍「讓球和」抵博o架。

（now671台周一下午3:00直播）

日本公認係今屆亞洲盃嘅頭號奪標大熱，呢樣嘢毫無爭議，不過正因為咁，東道主澳洲嘅媒體對佢哋帶有好強嘅敵意，連日嚟不斷報道「藍武士」主帥艾古爾涉嫌打假波單嘢，令到日本傳媒好唔高興。雖然話呢件事未必對日本隊造成乜嘢困擾，但係澳洲球迷鋤強扶弱嘅心態，可能比平時更強烈，巴勒斯坦今日獲得嘅支持吶喊，話唔埋可以蓋過班在澳日僑添。

當然，打波始終要講實力，巴勒斯坦係就係有6件外流球員，但都只係喺啲二、三流嘅聯賽，例如主力前鋒艾法華加拿响沙特搵食、馬穆特伊迪喺瑞典踢尼高平、後衞洛林保拿一直喺波蘭打滾、中場伊貝爾沙就响斯洛文尼亞土生土長等等。至弊係舊年贏得亞洲挑戰盃嘅好幾件功臣，今次都因為唔同問題冇入選，連當時帶隊嘅冠軍教頭馬穆特，由於响加沙間屋畀以軍炸爛咗，要留喺嗰邊幫手砌磚重建家園，改由艾爾哈辛帶隊，由上至下有5、6個位換咗人，而且前智利U17國腳前鋒查杜又轉唔切國籍，令到佢哋嘅偷雞本錢更少。
藍武士狂練433陣式

冇本錢偷雞有時未必係壞事，素來打波當打仗嘅巴勒斯坦，可以疊埋心水死守日本。大概日本都收到風，呢幾日狂練433攻擊陣式，乾貴士仲被刻意安排打左翼鋒，同手（月爭）有傷嘅香川真司重組「櫻花搭檔」，本田圭佑亦埋頭催谷死球，「藍武士」顯然預咗巴勒斯坦未必咁順攤，任你隊佢3、4球，盡量練多幾瓣破密集博開齋，呢啲環境博吓個好分嘅「讓球和」冇壞，唔通要個1.05倍主W嚟煲醋咩？
亞洲盃賽制：

現為分組賽階段，16隊分4組，每組4隊進行單循環比賽。每組首名及次名晉級8強。
亞洲盃D組