南韓攞「威」半場大

猪拉多纳

變陣省多幾粒爭首名

南韓想爭小組首名出線就一定要大炒，科威特唔想踢兩場就執包袱嘅話，今場亦一定要贏，所以呢場喺坎培拉舉行嘅亞洲盃A組第二輪賽事，個3.08倍半場入球大未嘗博唔過。

（now671台周二下午3:00直播）

南韓首戰小勝阿曼一球，淨勝球比起大勝科威特4:1嘅澳洲少成兩球，今日唔捉科威特嚟開刀，數番佢3、4球，星期六對住主辦國澳洲爭A組首名，就會非常被動，呢場波佢哋完全冇得保留。
科威特出局即「死得人多」

如果以「太極虎」第一場波嘅表現嚟講，佢哋中後場問題唔大，控球權保持得唔錯，最不足之處在於一埋到禁區，就節奏拖慢兼容易斷纜，教頭史泰歷克似乎亦考慮變陣，佢公開講咗句「冇100%狀態嘅話，呢場波好難有得踢」，韓國傳媒根據呢番說話，揣測一度受傷嘅李青龍同金昌洙，可能畀南泰熙、車斗里一少一老代替，其中用南泰熙嘅目的，好明顯為咗加快進攻節奏。不過，孫興民尋日突然發燒，就畀咗史泰歷克一個難題，假如呢件利華古遜前鋒唔出得，佢變陣嘅幅度可能會更大，李明柱、朴柱昊呢兩件比較攻得嘅中場，都可能派上用場，依家惟有希望孫興民快啲康復。

科威特就仲慘，首戰輸到面目無光，畀國內媒體大清算，「中場易斷、後防紙紮」、「球員年輕唔係藉口，教練馬亞路爾有責任教好佢哋」……簡直插個唔停，科國足總技術小組主席拿華夫仲講明，一旦出局就要成個教練系統，包括國內青訓系統全部改革，意味住大量人頭落地，咁嘅壓力下，科威特點都要博3分。但除咗龍門艾拉舒特、後衞侯辛法希爾、中場艾安馬聲稱有傷，上場踢得好曳嘅中場卡拉特艾卡達尼都話自己膊頭唔多妥，似乎想側側膊。班人心事重重，又要不自量力咁同南韓對攻，半場合作製造兩個入球有乜難呀？