皇馬打吡戰大反擊

猪拉多纳

冧莊金球獎 C朗撻着認真Mode

「睇住呀！」皇家馬德里巨星C朗拿度日前喺蟬聯金球獎後「大叫叔」上身，喺頒獎台上突然大叫一聲，成為全球焦點；佢攞獎冇耐更喺facebook上載操練相，擺明同全世界講即使攞咗獎都唔會鬆懈。周五凌晨西班牙盃十六強次回合，皇馬主場對馬體會，睇嚟馬體會都要「睇住呀」，因為C朗將要發威證身價，大盤值得捧場。

（now 632周五凌晨3時直播）

眾所周知C朗係極愛面子嘅球星，非常睇重榮譽同獎項，日前佢終於得償所願冧莊國際足協金球獎，不過總係有人覺得佢唔配攞呢個獎；好勝嘅C朗當然想用超凡表現叫呢班反佢嘅球迷收聲，今場既為矚目嘅「馬德里打吡」，皇馬更有出線危機，首回合作客輸畀馬體會0比2，成個反擊舞台已經搭好晒，造就機會畀C朗以救世主姿態拯救「銀河艦隊」，睇怕早排畀人鬧爆獨食嘅加里夫巴利今場唔傳波畀C朗都唔得，話晒人哋係堂堂金球獎得主喎！
馬體會鋒將把握力超強

其實唔單止C朗，皇馬全隊上下都肯定想翻盤成功，今場實會狂攻馬體會。之不過「銀河艦隊」咁做一定正中馬體會下懷，畢竟皇馬防守一向都唔係特別醒，只係攻力實在太癲，掩蓋咗呢個弱點；上季球隊都仲有防中沙比阿朗素頂得兩嘴，今季冇咗佢，主帥安察洛堤豁出去排出全攻陣，搵攔截力唔算勁嘅卻奧斯踢中場中，拍檔艾斯高同占士洛迪古斯都係識攻唔識守之人，今場若然只顧進攻，隨時畀馬體會有機可乘利用反擊KO皇馬。

況且馬體會唔係冇進攻人才，佐治高基、阿達杜倫同基沙文個個都獨當一面，前鋒文迪蘇傑把握力更係超強，「銀河艦隊」好可能顧得前嚟顧唔得後，今場捧入球大啱數。