歇完冬吼阿積士細盤

猪拉多纳

經過漫長嘅歇冬期後，荷甲將會喺今晚重開，打頭陣嘅係次席嘅阿積士主場對排第8嘅格羅寧根。雙方經過長時間嘅休戰，作戰狀態一定冇歇冬前咁好，加上呢兩隊波近年交手入波都唔係咁多，今晚隨時會係一場悶戰，大細中位數調整至3.5球，阿謙捧細盤。

（now 670周六凌晨3時直播）

阿積士喺歇冬前嘅表現比較反覆，更曾經喺主場淨吞維迪斯4蛋，表現其實唔係想像中咁穩陣。阿積士今仗仍有後衞祖爾韋特文、保利臣及左翼域陀費斯查因傷缺陣，前鋒史基賀臣或可候命，但球隊經過長時間休戰，狀態未必咁快就操番好，今仗要大勝對手唔係一件易事。
鬥格羅寧根要時間熱身

格羅寧根歇冬前表現其實唔錯，近4仗取得1勝3和嘅成績，3場和波都係聯賽同對手踢成1比1平手，可見球隊入球能力雖然唔高但防守仍算穩健。格羅寧根今仗仍有後衞歷克碧卡、夏迪保亞及中場賓莫沙因傷上陣成疑，相信球隊會繼續沿用過去嘅防守踢法與阿積士周旋。

此外，阿積士近年同格羅寧根交手入波其實都唔多，對上9次交手只有2場嘅總入球係達到3球，其餘賽事都係1球起2球止，可見呢個對賽組合似乎唔係咁易上演入球騷，今場大細中位數調整到3.5球，阿謙一於捧細盤。