曼城追殺殘「兵」

猪拉多纳

地頭上齊架生

衞冕冠軍曼城家陣又要展開追「車」之旅，不過嚟緊「藍月亮」連場硬仗，月尾撼「藍戰士」，今晚就硬碰阿仙奴，想爭標再冇失分空間，相信領隊比歷連尼會派番阿古路擔正，有佢同大衞施華攻堅，「兵工廠」唔係佢哋手腳，捧1.72倍曼城主勝！

睇番戰績，曼城已經連續12場聯賽不敗，上仗畀「拖肥糖」逼和1:1的確令人失望，但考慮到中場靈魂耶耶托尼離咗隊出戰非國盃，曼城霎時間要適應冇咗Yaya嘅影響係唔易，吸取過上仗教訓，比帥應該會盡遣扣關能力較強嘅戰將落場，盡早攞阿仙奴命。
阿仙奴出年季票唔加價

英媒預計，林柏特會有更多上陣時間，左閘亦會用助攻力更強嘅高拉洛夫，傷愈嘅阿古路就正選披甲，由「阿Kun」夥拍近期腳風甚順嘅大衞施華同占士米拿衝鋒陷陣，即使拿斯尼倦勤，火力都仲信得過。況且隊長高柏尼已經好番，有呢位老大哥鎮守後防，防線壓力都冇咁大啦！

相信大部分阿仙奴球迷近排都幾開心，事關球會嘅季票原本最平係1,014鎊（約1.2萬港元），最貴嘅要成2,013鎊（約2.4萬港元），價錢貴絕歐洲，但「兵工廠」日前突然「良心發現」，喺官方twitter宣布下季波飛唔加價，對於想入場睇波嘅「廠迷」嚟講，無疑係天大喜訊。

另一單令「廠迷」興奮嘅，當然係佢哋上場炒史篤城3蛋啦，不過Yennie認為史篤城實力一般，唔能夠反映阿仙奴狀態。最濕滯係呢支倫敦球隊受傷病問題困擾，基奧特、奧斯爾傷愈，又輪到右閘迪保治同中場阿迪達打柴，實力大幅削弱。睇埋今季阿仙奴作客成績，11場波只錄4勝3和4負，當中對住實力分子車路士同修咸頓都係輸波收場，殘陣造訪「二哥」曼城，情況唔多樂觀！
Data King：曼阿對戰勁多紅牌

‧兩軍對上9次交手夾埋出現6面紅牌。

‧雙方近7次英超喺曼城球場碰頭，一共出現28個入波。

‧兵工廠今季用頭槌攻入8球為英超第二多。
盤路解碼

曼城37戰24次開大，大盤率約65%。