熱刺半場和好路

猪拉多纳

英甲嘅錫菲聯近年可謂盃賽專家，繼上季殺入英足盃4強後，今季英聯盃又再次進身4強，周四凌晨會喺聯賽盃4強首回合作客熱刺，錫菲聯晉級過程充滿說服力，先後淘汰英超嘅韋斯咸同修咸頓，今場有力同熱刺一拚，開波好氣好力下至少頂到半場，科娜一於捧半場和！

（TVB 301周四凌晨3時45分直播）

錫菲聯自從喺2013年10月任命尼祖哥洛夫為領隊後，聯賽成績雖然麻麻，但盃賽成績就非常突出，證明佢哋踢盃賽有啲心得，上季英足盃淘汰阿士東維拉、富咸、查爾頓等高班對手，簡直係遇神殺神、遇佛殺佛，爆冷闖入4強；到咗今季就喺英聯盃搞掂韋斯咸同修咸頓呢兩支英超前列球隊，月初又喺英足盃第3圈作客大炒昆士柏流浪3蛋，都咪話唔堅！
主戰錫菲聯睇定食

熱刺論實力當然超班好多，不過呢班波表現飄忽，早前英足盃對住般尼竟然開波8分鐘就輸緊兩粒，好彩完半場前就追番晒，呢隊波近四場皆開出半場和，而錫菲聯今場作客料會穩陣行先，目標係保住不敗，等次回合返到主場先諗計同對手死過，今仗半場和有得諗。