「虎狼之戰」夾計做「細」界

猪拉多纳

亞洲盃8強今午爆發「虎狼之戰」！往績佔晒上風嘅「太極虎」南韓，剛啱「甩」咗兩隻虎牙，想咬死「白狼」烏茲別克唔係話咁易，一於博1.43倍入球細。

（now671台周四下午3:30直播）

南韓有本事响A組壓倒東道主澳洲首名出線，當然有一定斤両，問題係佢哋响分組賽表現好一般，3場波射15腳入得3球，射門入球率得8.6個巴仙，仲低過中國嘅21個巴仙。對澳洲嗰場直情係捱打苦勝，控球比率得33個巴仙，完全處於劣勢，唯一令韓國球迷欣慰嘅係，班國腳有鬥心防守夠韌，所以封咗佢哋一個新朶─沼澤足球，意思係搞到對手寸步難行。

「沼澤足球」對住強隊有好處，但係對住低半班嘅烏茲別克，南韓應該係採取主動嘅一方，咁就有啲麻煩嘞。事關佢哋硬撼澳洲之後，具滋哲傷咗手（月爭）韌帶打柴，同埋李青龍一樣緣盡今屆大戰，另一件主力朴柱昊亦唔多掂，「太極虎」主帥史泰歷克雖然有南泰熙、李明柱同李根鎬可以補上，不過佢哋嘅攻擊性太強，中場攔截削弱咗，點樣做到攻守平衡，係呢個德國佬最頭痛嘅嘢。

烏茲別克自1994年起11戰南韓得1勝2和8負，幾乎可以話係「太極虎」嘅私房菜，佢哋自己知自己事，分組賽壓軸戰對沙特咁關鍵，「白狼」一樣夠膽玩車輪戰換咗5件，就知佢哋除咗有信心打低沙特，仲刻意留力8強搏南韓，以呢班波嘅實力，南韓好難炒佢哋，所以投X首選一定係入球細，次選係烏茲別克受讓平半嘅下盤。