日本磨利刀等劏阿聯酋

猪拉多纳

亞洲盃8強戰今日續演兩仗，重頭戲係下線日本鬥阿聯酋，日本經過三場分組賽雖然未遇考驗，但主力已經上晒力，面對踢法開放嘅阿聯酋，無論級數同經驗都贏晒，讓球盤日本只讓一球，上盤值得再追。

（now 671周五下午5時30分直播）

日本喺分組賽三戰全勝，共入七球並保持不失，雖然贏伊拉克同約旦入球唔算多，但全場控制戰局機會無數，若非本田圭佑腳風唔順四度中柱，入球絕對不只此數。更重要係日本過去兩場分組賽對手都擺鐵桶陣死守，令佢哋前線打快速反擊嘅空位唔多，但阿聯酋喜歡主動出擊，實力高一班嘅日本鋒將肯定會有更多發揮空間。

西亞足球衰落，喺今屆賽事暴露無遺，年輕嘅阿聯酋已算係做得較好嘅球隊之一，有「海灣美斯」之稱嘅中場大腦奧馬鴨都拉文校炮，配合前線阿密特卡利同穆巴奧特，喺頭兩仗對卡塔爾同巴林都十分搶鏡，但分組賽最後一仗面對級數較高嘅伊朗，無論點主動都製造唔到較有威脅埋門，而且阿聯酋防線空位多，對住弱旅卡塔爾同巴林都要失波，遇上實力更強嘅日本凶多吉少。
兩伊鬥悶 吼半場和

同日早場仲有伊朗對伊拉克（now 671周五下午2時30分直播），呢兩班波係今屆亞洲盃最悶蛋球隊，伊朗保持全勝同零失球，但中前場欠缺創造性，速度緩慢組織迂迴，連快速反擊亦欠奉，只係一味同對手鬥耐性，上輪對住阿聯酋非勝不可都要靠補時嘅幸運入球至贏波。佢哋今仗對手伊拉克同樣靠守，至今踢咗三場分組賽只係失過一球畀日本，欠缺組織進攻能力，就算對魚腩巴勒斯坦都不思進取。兩軍喺分組賽已習慣謀定後動，上半場都以守為先鬥歎慢板，嚟到淘汰賽自然更加謹慎，今場入球細賠率熱到冇味，博1.9倍半場和好過。