C朗擔正皇馬科騷

猪拉多纳

3星出擊搏殺夜

西甲三雄皇馬、巴塞、馬體會今晚遇魚腩，三位星級射手C朗、美斯同費蘭度托利斯準備起筷擦餐勁！皇馬打頭陣作客科爾多瓦，C朗甩拖後演出仍然Sharp醒，近日仲扮「聖誕老人」街頭派禮物畀小朋友。睇嚟呢位回復單身嘅巨星唔要綠帽只想今仗「戴帽」，皇馬讓兩球照捧讓球客勝。

（now 632周六晚11時直播）

C朗同伊蓮娜分手原因眾說紛紜，包括男人最忌嘅「戴綠帽」，不過呢位葡萄牙國腳並冇受流言蜚語影響，上仗西甲梅開二度，今季聯賽已累積入二十八球，拋離次席美斯九球，認真犀利。C朗喺場外亦有「佳作」，趁周中冇比賽，戴上假髮假鬚去到馬德里街頭派簽名足球畀小朋友，哄動現場為市民帶來歡樂。C朗情傷迅速痊愈，嚟緊日子當然要證明「活得比你好」，今場隨時又大演帽子戲法，掃走「綠帽男」污名，注定科爾多瓦唔好彩。科爾多瓦一向欺善怕惡，今季鬥強隊都輸到大大鑊，包括吞華倫西亞三蛋及2比4不敵馬體會，上個月更0比5慘敗畀巴塞，面對西甲攻力最強嘅皇馬，淨輸三球或以上好正路。
馬田奧迪加特未上陣先擦鞋

另外，挪威16歲超新星馬田奧迪加特加盟皇馬後，即成「萬人迷」，除咗有女粉絲排隊示愛，佢喺「上艦」記者會更獲C朗及沙治奧拉莫斯親自歡迎。呢位小朋友亦好識做，刪除twiiter上讚過美斯嘅兩段留言，更自爆最愛C朗，簡直係超級世界仔！除咗馬田奧迪加特，西班牙《阿斯報》再爆皇馬已斟掂高士路中場盧卡斯施華，轉會費1,400萬歐元（約1.21億港元），雙方將簽約六年半，交易好快正式公布！