C朗甩拖照入波 皇馬讓2球唔嫌多

猪拉多纳

經歷月頭嘅少少滑落之後，皇家馬德里終於重拾霸氣，呢支西甲「一哥」今晚造訪升班隊伍科爾多瓦，睇怕又係C朗嘅Show Time！近期新聞多多嘅佢情場失意，但喺綠茵場上反而更勇猛，由佢夥拍「變種助攻手」賓施馬攻堅，對親強隊都例牌腳軟嘅科爾多瓦點頂得住吖？「-2」嘅1.93倍「讓球客勝」要捧之餘，1.92倍入球大都要兼顧。

（now632台周六晚11:00直播）
科爾多瓦波飛售罄 遇強隊必輸鑊勁

近日傳媒嘅焦點都落喺C朗同伊蓮娜甩拖單嘢度，難得C朗夠晒Pro冇受影響，上仗對基達菲仲頭頂腳踢梅開二度添，各位「艦躉」唔使擔心啦！C朗嘅好拍檔賓施馬入波唔算多，但今季轉型做助攻手反而係一大亮點，上場波連扭兩件再交畀C朗射空門呢球，盡顯功架。加埋「大聖爺」加里夫巴利為留隊要證身價，肯定搏命啦！

皇馬大駕光臨，科爾多瓦禮拜三已經宣布賣晒今仗總共21,322張波飛，「艦隊」號召力驚人唔使多講，科爾多瓦近3戰2勝1和亦係一大主因。不過呢支升班隊伍今季面對前5勁旅輸晒，當中對巴塞同馬體會分別大敗0:5同2:4，撞正復甦嘅皇馬想唔輸鑊勁都難啦！