布城勢勁唔怕錘仔幫

猪拉多纳

今晚有三場英足盃第四圈賽事，度士睇中英甲布里斯托城主場對英超韋斯咸一役。布里斯托城近期錄得四連勝氣勢強勁，而且主場戰績亦唔錯，今仗對手雖然係英超球隊「錘仔幫」，但度士睇好佢哋可以喺主場同對手踢成均勢全身而退，讓球主客和韋斯咸讓一球，梗係捧讓球主勝啦！

（now 621及633周日晚10時直播）

布里斯托城依家喺英甲排第二，球隊近七仗取得六勝一和狀態甚弗，而且仲已經連贏四場，氣勢可以話一時無兩。布里斯托城今季主場戰績亦相當標清，對上六仗取得全勝未輸過，球員喺主場出戰相信會信心大增，雖然兩名借入嘅新兵佐治沙維利及達華尼亞唔符合資格喺英足盃上陣，但近期頻頻入波嘅中場艾曼紐湯馬士及前鋒馬特史密夫都大有機會出戰，今仗有力攻破「錘仔幫」大門。
韋斯咸傷兵多未必搏

「錘仔幫」韋斯咸啱啱喺聯賽主場擊敗侯城，球隊現時士氣相當唔錯，但呢班波作客表現始終畀唔到人信心，對上十場作客賽事只係贏過一場咁大把，而且今仗打和仲可以返主場踢重賽，對「錘仔幫」嚟講未必係壞事。韋斯咸近期多名球員皆有傷在身，首席射手迪亞法沙高因背傷要繼續抖，中堅湯堅斯及占士哥連斯亦有傷在身未必上陣，球隊陣容不整下未必咬得入布里斯托城，度士睇好布里斯托城今仗可保不敗身，一於捧讓球主勝。