寧搏英總唔吼歐霸 錘仔客W有回「布」

猪拉多纳

今季英超最令人驚喜嘅球隊，首推修咸頓，其次就係韋斯咸，「錘仔幫」依家排聯賽第7都咪話唔威，但領隊艾拿戴斯坦承對歐霸盃席位唔太感興趣，情願喺足總盃有一番作為，今晚足總盃第4圈對住甲組仔布里斯托城，韋斯咸1.82倍客W非常吸引！

（now621及633台周日晚10:00直播）

韋斯咸對上一次捧盃已經係35年前，之後最叻都係06年打入足總盃決賽輸畀利物浦屈居亞軍。雖然近年冇乜盃運，但「大Sam」就認為今屆有機會再創歷史，除咗因為人腳不俗，聯賽冇乜壓力同抽到靚籤都係主因，佢賽前特別提到「錘仔幫」會喺來季搬新主場，希望球員為Fans留下美好回憶。
「布城」或為英錦賽4強留力

韋斯咸今屆踢足總盃又真係好認真，上圈出強陣鬥愛華頓，踢到重賽憑卡頓高爾入波喺加時擊敗對手，幾經辛苦踢足兩場先晉級，今場又點會甘心輸畀低組別球隊呢？雖然佢哋有迪亞法沙高要踢非國盃缺陣，好在安祖卡路爾、安拿華倫西亞入球能力唔曳，對家布里斯托城好難夠砌。

樂比曾經喺英國睇過「布城」比賽，但當時佢哋仲踢緊英冠，到03年即使降班英甲都冇自暴自棄，今季仲表現突出暫列第二，大有機會染指冠軍同升班，不過咁樣反而令佢哋對足總盃戰意大減。而且佢哋亦殺咗入英錦賽4強，周中過埋基寧咸嗰關，就可以殺入喺溫布萊踢嘅決賽，計落今場又好難同韋斯咸搏命喎！
樂比推介：韋斯咸（客勝）