伊巴謙食「私房菜」食上癮 聖伊天遇PSG難攞分

猪拉多纳

「你係世界上最勁嘅9號仔！」呢句出自巴西一代傳奇9號朗拿度口中嘅說話，讚嘅係伊巴謙莫域。雖然伊巴謙喺巴黎聖日耳門變咗10號仔，但正如「大哨」話齋，伊巴謙能傳擅射踢法似足9號仔，今戰PSG作客聖伊天，食粥食飯睇佢喇！

（TVB302周一凌晨4:00直播）
PSG首循環派5蛋

球壇浪子伊巴謙莫域踢過馬模、阿積士、祖記、米蘭雙雄同巴塞，大部分時間都着9號波衫，亦着過8、11、18等號碼，但無論背脊印住乜嘢冧巴，都係孭住成隊波嘅得分重任。呢支「瑞典神箭」今季對住聖伊天特別醒神，首循環大勝5:0上演帽子戲法，個幾禮拜前法聯盃贏1:0又係佢一箭定江山，今戰有望再喺呢隊「私房菜」身上入波，終止法甲4場入球荒。

主隊聖伊天雖然近12場聯賽不敗，失13球係法甲最少，但當中就有5球係畀PSG攻入。咁都未算慘，「非國盃效應」對佢哋嘅影響相當大，科特迪瓦嘅麥斯格拉度、伊斯美迪奧文迪要為國效命，費倫丁普巴亦要代表畿內亞出戰，戰力大打折扣，鬥PSG攞到1分都當贏啦！