車仔搵紅軍出氣!

猪拉多纳

上場輸得醜 寸王要補鑊

雖然日前嘅英足盃第4圈證明咗足球場上咩都有可能發生，甲組仔巴拉福特都可以爆大冷踢車路士出局，不過大家都知道，車仔領隊係被公認為球壇其中一位最佳教頭嘅莫連奴，佢點會畀球隊一周內接連喺兩個盃賽出局呀？周三凌晨嘅英聯盃4強次回合，車仔主場迎戰利物浦，車仔肯定會將英足盃恥辱性出局嘅怒火，發洩喺紅軍身上，今場熱捧1.47倍主勝！（TVB 301周三凌晨3時45分直播）

車路士喺首回合作客利物浦打和1比1，英聯盃4強戰兩回合法定時間內唔計作客入球優惠，但如果今場經過加時仍然互無紀錄，車仔就可以憑住首回合嘅作客入球晉級。
利物浦焗攻不利

車仔今場當然可以又試「泊大巴」同紅軍拖到加時，不過經過上場英足盃喺主場恥辱性反輸畀巴拉福特2比4後，球隊上下今場都想一吐烏氣，加多兩錢肉緊，務求喺90分鐘內搞掂紅軍。上場派出多名副選嘅莫連奴今場料會派出最強陣容應戰，因為呢位「寸王」係唔會容許佢架「黃金戰車」幾日內「連炒兩鑊」！

雖然身為利迷嘅科娜好想利物浦可以喺隊長謝拉特離隊前為佢贏得獎盃，不過我都係一個講實際嘅人，利物浦今場對手係車路士，無論人腳定領隊嘅級數都不及對方。紅軍主帥羅渣士嘅教波功力同佢師傅莫連奴相比仲差好遠，羅帥對上4次對住師傅領軍嘅車仔，輸咗3次，今場喺車仔超勁嘅主場作戰，更加冇爆冷機會。而且根據賽制，利物浦今場一定要入波先有價講，唔攻唔得，但以紅軍今季嘅攻力，又點會攻得入車仔好多球吖。相反紅軍過分搶攻，防線會更為不穩，隨時輕易畀車仔幾個突擊就搞掂。嫌主勝太熱嘅朋友，不妨進取啲博讓球主勝。