西維爾大反擊喪炸「賓奴」

猪拉多纳

西班牙盃8強次回合周五凌晨繼續開打，重頭戲有西維爾主場火併愛斯賓奴，首回合落後愛斯賓奴1比3嘅西維爾今場肯定會狂攻博翻身，愛斯賓奴係正宗地頭蟲，作客例牌腳仔軟，失波特別多，今場1.72倍嘅大盤有買趁早嘞！

（now 632及TVB 13周五清晨5時直播）

齋睇兩軍近況，咁就當然愛斯賓奴秤先，「賓奴」錄得4連勝，反觀西維爾則兩連敗，但愛斯賓奴呢4場都係主場出戰，呢隊波一去到作客就會走晒樣，係西甲作客成績最屎嗰隊，近4場作客一共失咗11球，今場想守住西維爾嘅狂攻，真係好難囉！

上屆嘅歐霸盃冠軍西維爾今季喺失去拿傑迪錫、艾拔圖摩蘭奴、法斯奧等主力嘅情況下，喺聯賽仍然取得唔錯嘅成績，暫排喺西甲第5位，教頭艾美利眼光獨到識得簽人係原因之一，畀華倫西亞棄用嘅班尼加嚟到西維爾成功鹹魚翻生，又從巴塞借得潛質小將迪路菲奧，而利物浦失意前鋒伊亞高艾斯巴斯借到球隊後，喺盃賽經常有好表現，靠住呢班「滄海遺珠」，再加上主場聲勢，西維爾有力攻破客隊大門，今場大盤值捧。
維拉利爾翻嗒基達菲

阿King順便講埋另外兩場8強次回合賽事，先有基達菲主場對維拉利爾，維拉利爾近況不俗，首回合喺主場亦只係贏得對手1粒，今場唔會掉以輕心，客勝有望。最後畢爾包會喺主場迎戰馬拉加，首回合兩軍打和0比0，畢爾包狀態唔掂，而馬拉加今場作客料會以守為先，半場和值得一博。