阿仙奴半場發維

猪拉多纳

1.8億「野獸版巴利」即買即用

近期愈戰愈勇嘅阿仙奴，今晚英超坐鎮主場迎戰火力全無嘅阿士東維拉。阿仙奴主帥雲格以往「險簽」成籮，但冬季轉會窗重開，佢罕有地當機立斷買人，仲話啱啱新加盟嘅「野獸版巴利」基比爾包列斯達可以即買即用添！可惜弗爆嘅「A山」阿歷斯山齊士有傷未必出得，讓球主客和要讓到兩粒唔夠穩陣，但佢哋近期好旺半場勝，不妨追多鋪。

(now 621周日晚9時30分直播)
維拉頹爆 前鋒唔識入波

「教授」雲格孤寒成性，以往曾經差啲買到未成名嘅美斯、C朗、伊巴謙莫域同加里夫巴利等巨星，「險簽」陣容勁到嚇死你，仲係咁畀人抽水，近日加里夫巴利表示喺轉投熱刺之前勁like阿仙奴。今個冬季轉會窗重開，雲格終於買入「野獸版巴利」，豪花1,530萬鎊（約港幣1.8億）羅致維拉利爾後衞基比爾包列斯達，佢個樣有少少似加里夫巴利，但仲黑啲同兇惡啲。要知道「教授」買前鋒或中場就捨得使錢，買個後衞用千五萬鎊真係好罕有，睇得出該隊防線對正宗中堅嘅迫切性，難怪雲格話打算畀基比爾包列斯達今仗即刻上陣啦！呢位高大嘅巴西中堅撞得兩嘴，技術唔曳又可出擊助攻，絕對開正阿仙奴嗰瓣。

至於對手阿士東維拉則頹到冇朋友，佢哋最大問題係唔識入波，齋計聯賽已經5場交白卷，近期只曾喺英格蘭足總盃對次一級嘅黑池同般尼茅夫有士哥，雖剛借到曼城翼鋒史葛冼佳亞，但箭頭賓迪基冇態兼目標大易被嘜死，好難威脅到阿仙奴防線。
走勢強勁 旺由頭帶到尾

不過，兵工廠王牌阿歷斯山齊士腿筋有傷，賽前雲格講到明唔會冒險派佢上陣，冇咗呢位智利射手壓陣，對進攻影響唔細，讓球主客和要讓到兩粒，即係阿仙奴要贏3球先有錢收，真係唔多穩陣。睇番阿仙奴之前7仗贏咗6場，均係由上半場贏到尾，既然認定佢哋會擸晒3分，主W得1.17倍冇肉食，不妨再追兵工廠半場勝，1.59倍咪嫌少呀！