些路迪格流宿敵大火併

猪拉多纳

老牌打吡 重演經典

蘇格蘭聯賽盃4強締造經典重現，兩支老牌宿敵些路迪同格拉斯哥流浪闊別3年後，今晚終於再度碰面，喺中立場咸普頓公園球場爭奪決賽權。格流3年前因破產，被罰降落蘇乙比賽，但並未扼殺呢支百年老店，球隊連升兩級，今季已殺上蘇冠，重返蘇超指日可待，今仗率先預演「老牌打吡」，眾將士亢奮搏命。至於些路迪亦要把握機會，以「大哥」身份教訓死對頭，絕對唔會手軟。雙方勢必踢到飛沙劈石，博入球大。

（周日晚9時30分開賽）
格流不忿輸畀金錢

財政問題曾令格拉斯哥流浪崩潰，但球會始終根基深厚，連奪蘇乙、蘇甲冠軍，現時位居蘇冠第2位，有望下季升上蘇超。雖然格流唔及昔日風光，但憑其號召力，仍有唔少高質素球員助陣，包括4季蘇超神射手基斯保迪、老牌前鋒堅尼米拿，並保留麥高洛治等多位舊班底，級數可媲美蘇超球隊，上圈正係淘汰蘇超聖莊士東，所以今次面對些路迪，都未驚過。格流內部一直深深不忿，仍堅信自己係強隊，只係「輸畀」金錢，今仗正係證明實力嘅好機會，踢走些路迪，省番靚金漆招牌。

些路迪過去兩季壟斷蘇超，卻惹來閒言閒語，被嘲諷係因為格流被罰降班，先至獲得佳績，條氣亦唔順，難得遇上格流，當然要盡數對手，畀世人知道邊隊先至係真正「蘇格蘭王」，即使格流已淪為蘇冠仔，亦要全力「鞭屍」。些路迪狀態弗爆，近4場正式比賽全勝，入波唔成問題。