活力飛駒飲頭啖湯

不死鸟

一如過往，少基在暑期馬經圍繞剛季到港、未有出賽的自購馬為主，逐匹揭開底蘊及評估前景，明日開鑼戰率先有兩匹登場，當中以鄭?「活力飛駒」較多人品題，早就說過這匹正宗短途馬，現已4歲宜盡早用，睇番紙上賽績，在澳洲新南威爾斯共上陣9次，取得3冠1亞2季，撇開08年裡5戰全入三甲不談，今年2月便在蘭域1200米三級賽爆冷勝出，可能有人會認為有賴場地軟慢之助，惟翌仗在好地上角逐1400米二級賽，輸畀明星馬Mic Mac唔夠個半馬位跑第五，可以證明先前贏三級賽唔係符碌，來港評91分，你話有力攀上110分我真的不信，畢竟在彼邦算跑得多，難再有大幅進步，要響2班贏一、兩場又並非太難。
另外，血緣方面，其母當年一出即勝，又試過久休達廿星期後出賽上名，乃擅跑新鮮之輩；「活力飛駒」兩歲首次上陣跑第二，3歲初出即贏馬，證明也是休出特強，與上次在澳洲出賽相隔半年，用新鮮跑最短途，這啖頭湯切勿錯過！