曼聯喪攻劍橋聯

猪拉多纳

獵狐陣成功 食過翻尋味

堂堂曼聯對住乙組仔劍橋聯要喺英足盃第4圈踢重賽，當然係勁冇面，為咗令恥笑嘅人唔再笑得出，「紅魔鬼」今場返到主場幾大都要炒番場，證明自己仍然係「王者曼」！曼聯上場派出朗尼、尹佩斯、法卡奧同迪馬利亞嘅喪攻陣效果不俗，今場對住乙組仔都冇得放鬆，誓要怒炒對方洩憤，讓球主勝曼聯讓二球照捧！

（now 621、631、668周三凌晨3時45分直播）

曼聯早排攻力非常不濟，主場對修咸頓一球不入，跟住作客防守力弱嘅昆士柏流浪竟然要靠防中費蘭尼破僵局，不過最離譜係英足盃第4圈畀劍橋聯悶和0比0，劍橋聯因有「劍橋」兩個字關係，「紅魔鬼」遭網民瘋狂恥笑係「學界最強」。為咗解決呢個問題，上場聯賽對戰「狐狸」李斯特城，紅魔領隊尹戈爾派出全攻陣，出齊朗尼、尹佩斯、法卡奧及迪馬利亞等進攻球員，結果取得明顯成效，上半場就狂數對手3球，最尾輕鬆贏波。
乙組仔去奧脫福腳軟

「紅魔鬼」今季使咗咁多錢買人，除咗目標係來季重返歐聯外，至少都要捧番個盃啦！曼聯一早喺英聯盃恥辱性大敗於甲組仔米爾頓凱恩斯腳下，英足盃係佢哋最後希望，今場英足盃第4圈重賽，曼聯再贏唔到，曼市暴動都似呀！尹帥今場應會強陣出擊，再排喪攻陣，晉級之餘更要大勝一場，等全世界睇到曼聯強勢返嚟！

講真，乙組仔劍橋聯想爆一次大冷，唔係完全冇可能嘅，不過成功機會微乎其微囉，一來曼聯已經吸取教訓，今場戰意旺盛，二來劍橋聯今次係到訪奧脫福球場，成班球員冇幾個係見過大場面，去到實畀在場7萬幾個觀眾製造出嚟嘅震憾性聲音嚇窒，而且呢隊波一作客防守力就會變差，今場讓球主勝可以放心捧場。