哈化沉淪難擋利華

猪拉多纳

多蒙特回師主場戰鬥格

德甲快車繼續嚟，今晚續演第十九輪剩餘五場比賽，黑柴喺上星期五已經講過，歇冬後要追捧多蒙特同長反哈化柏林，結果上周末都有盈利，今晚唔好畀佢停，當中哈化柏林主場對利華古遜，利華作客讓到半一都唔嫌多，一於追上盤。

（有線62及202台周四凌晨3時直播）

黑柴星期日列舉咗十個理由睇死哈化柏林，結果佢哋嘅表現完全在意料之中，作客輸畀實力平庸嘅雲達不來梅0比2之餘，基本上冇乜頑抗本錢，球隊狀態同士氣都喺谷底，德國傳媒已經將主帥盧爾侯卡列為下一位被炒教練嘅大熱門，仲大膽估計喺佢離任之前，哈化都好難贏一場波添！

哈化今仗只有細貝萌停滿復出，但傷兵問題依然嚴重，黑柴相信佢哋短短三日時間好難轉弱為強。相反利華古遜上輪同多蒙特高手過招下踢成0比0，失咗兩分之後畀慕遜加柏、史浩克04同奧格斯堡一齊過頭，聯賽榜已經跌到第六位，今晚對手大幅轉弱，呢三分真係志在必得。
奧格斯堡踢完雪戰未回氣

另一場直播多蒙特主場鬥奧格斯堡（有線61及201台周四凌晨3時直播），多蒙特上仗同利華和波兩敗俱傷，「蜜蜂兵團」即時跌落包尾位置，但計表現並唔失禮，今晚教練高普安排蘇保迪、米希達利恩同奧巴美揚復任正選，兼且重返西法倫球場踢2015年第一仗，當然不勝無歸！

奧格斯堡剛戰主場擊敗賀芬咸，不過末段死過翻生贏得略帶運氣，而且比賽喺大雪中舉行，一眾球員踢到舉步維艱；事隔三日匆匆再戰，人丁單薄兵源固然唔夠多蒙特充裕，仲要少一日休息時間，去到狂熱嘅西法倫球場注定冇運行，多蒙特讓球主勝有2.12倍博得過。