飛燕諾換血搶攻大作戰

猪拉多纳

拆骨＝重生！英超嘅修咸頓季前慘遭拆骨，畀外界睇死會降班，但踢咗半季有多，「聖人」依家排喺第四位，拆完骨反而更上一層樓；遇到同樣遭遇嘅亦有荷甲球隊飛燕諾，領隊、主力齊被撬走，但今季keep到成績之餘，更踢出賞心悅目足球，飛燕諾周四凌晨會喺荷甲作客海倫芬，大盤值得捧場。

（now 670周四凌晨1時30分直播）
海倫芬有吉士埋牙搏拳

領軍飛燕諾三季嘅教頭朗奴高文上年夏天過檔修咸頓執教，上季幫球隊入咗二十三球嘅加斯安奴柏利亦跟埋恩師去「聖人」，仲有後防三虎將迪維積、真馬特同馬田斯恩迪亦都走埋；飛燕諾一次過冇晒咁多主力，其實真係好傷，好在新帥魯頓眼光唔錯，買返嚟嘅新兵幫到手，好似進攻中場杜蘭斯查能傳擅射，體力充沛，另一中場艾亞馬迪則令球隊攻守更加平衡，經驗十足嘅門將華美亞喺後面指揮若定。不過最緊要都係新舊球員適應咗魯頓嘅四三三陣式，為球迷帶嚟精彩嘅進攻足球，今場作客當然係照攻可也！

海倫芬近五場贏咗三場，兩大前鋒烏夫同史拉格維亞頻頻入波，海倫芬今場主場出戰，冇理由咁冇膽玩死守，大盤唔怕捧。