摩納哥銅牆鐵壁吼細盤

猪拉多纳

今晚有唔少盃賽上演，阿King睇中咗場法聯盃四強戰，由摩納哥主場對巴斯蒂亞。摩納哥近期演出非常穩健，球隊防線更如銅牆鐵壁，已經連續多場冇失波，今場面對近七仗作客未贏過，而且攻力麻麻嘅巴斯蒂亞，阿King相信呢場波入波唔會多，捧細盤！

（周四凌晨4時開賽）

摩納哥近十三仗未輸過攞到十勝三和佳績，更重要嘅係佢哋喺呢十三場波入面竟然零失球。摩納哥防守力咁強，踢淘汰賽特別着數，今仗仲有主場之利，相信可延續球隊近期佳績。

巴斯蒂亞近期錄得四連和表現未算太差，但呢四場波喺法定時間90分鐘只係入得兩球咁大把，而且嗰兩球分別係十二碼同對手擺烏龍，可見球隊攻力非常唔掂。巴斯蒂亞作客表現亦相當麻麻，球隊對上七仗作客都贏唔到，今仗造訪氣勢如虹嘅摩納哥隨時玩死守，阿King估計今仗入波唔會多，推介入球細。

至於南美自由盃外圍賽首回合賽事，哥倫比亞球隊卡達斯近期陣容變動頗大，加上喺聯賽首仗輸波，今仗作客巴甲球隊哥連泰斯相信會踢得保守，捧細盤。至於巴拉圭球隊波特諾在休季期間有前拜仁中場祖利奧杜斯山度士離隊，作客委內瑞拉球隊塔奇拉相信唔會易踢，讓波非常牙煙，捧下盤。