野獸唔留手祖記打爆AC

猪拉多纳

祖雲達斯、AC米蘭同國際米蘭被譽為意甲北方三強，過往碰頭例牌鬥得燦爛，但隨住「斑馬軍團」近年獨大，米蘭雙雄演出無復當年勇，令到賽事吸引度降低唔少。今晚意甲壓軸上演「褪色大戰」，「斑馬」箭頭泰維斯講明唔會留手，主場要撕破傷兵滿營嘅AC米蘭防線話咁易，一於揀1.82倍「讓主」。

（TVB301周日凌晨3:45直播）
主場不敗火力驚人

「斑馬軍團」今季主場惡到痹，至今未嘗敗績，意盃連意甲近3戰仲全部贏晒，當中羅拔圖佩雷拉同泰維斯聯手貢獻4球外，保羅普巴更係場場有波入，全隊埋單勁轟12球，盡顯強大火力。近兩次鬥AC都有斬獲嘅泰維斯，賽前話到明雖然對手狀態唔好，但都唔會掉以輕心，實行要搏到盡爭取士哥喎。今場馬治斯奧坐完波監復出，聯袂維達爾、派路、保羅普巴等派牌好手擔正搏殺，「野獸」肯定大把入波餐士啦。

咪睇AC上場擊敗帕爾馬，結束3連敗劣勢，其實對手喺聯賽排緊倒數第一，今場造訪真正「冧巴溫」嘅祖雲達斯，睇怕好難再也文也武咯。而且佢哋條防線殘到嘔，迪施基利奧、沙柏達華倫西亞、阿比迪、邦利拿全抖，麥薩斯又坐波監，搞到連續7場都有失波，即使AC喺冬季轉會窗羅致柏列達、保捷迪同舊部安東連尼應急，弊在新舊隊友缺乏時間磨合，對住鋒力稱霸意甲嘅「斑馬軍團」隨時出晒醜都似。