多蒙特私房菜宴「客」

猪拉多纳

5季連贏弗賴堡9場

勢估唔到球星如雲嘅多蒙特，竟然會淪落到要喺降班區掙扎。班「粉絲」由季初「O晒嘴」覺得冇可能，到依家開始擔心佢哋會一沉不起降班收場。不過我就對「蜜蜂軍團」依然有信心，至少一班主將喺歇冬期間都冇爭住跳船吖！今晚作客護級對手弗賴堡，多蒙特實力高幾班，加上近年都食住弗賴堡，今場就一於用「私房菜」嚟宴「客」啦！

（有線64及203周六晚10:30直播）
奧巴美揚歸隊

驟然由爭標勁旅變咗做護級分子，好多球迷都睇死多蒙特會星散，好在盛傳一月會離隊嘅曉姆斯、馬高列奧斯同哥斯基奧斯等主力都冇走到。雖然剛剛又再輸多場畀奧格斯堡，但教練高普拍心口話從未驚過降班！今晚作客去到弗賴堡，將會有踢完非洲國家盃嘅喀麥隆國腳奧巴美揚歸隊助陣，相信佢已經抖夠，今場可以恢復到最佳狀態。我睇以「蜜蜂軍團」嘅星級班底，反彈係必然嘅事，時機啱啱嚟到要對弗賴堡，正正就係多蒙特最想歎嘅「私房菜」！
近9次對賽攻入29球

睇返多蒙特近5季9次同弗賴堡交手，無論主場定作客都贏晒。呢9連勝入面，重有5場賽果係大勝3球或以上，總得失球係入29球失4球，可見多蒙特係從來唔會對弗賴堡客氣囉！弗賴堡前排向雲達不來梅借用前鋒尼斯彼德臣，不過今場有瑞士箭頭美密迪足踝受傷缺陣，一得一失打返個和。再講主隊真係實力有限，實在難阻多蒙特呢場全取3分。
頂占筍盤：多蒙特 （客勝）