錘魔互斬魔吼半場和

猪拉多纳

韋斯咸曼聯鬥玩燒味戰術

今晚英超壓軸好戲，「紅魔鬼」曼聯作客火併「錘仔幫」韋斯咸，紅魔主帥尹戈爾近日變身「燒味師傅」，堅抄前任莫耶斯「九九八十一斬」，以為自己好醒，但韋斯咸領隊艾拿戴斯最擅打呢家波，尹戈爾冇咁易「斬斬斬」就斬到舊大叉燒，個波係場中球來球往，初段隨時處於膠着，斯維力撐半場和。

（now 621周一凌晨零時15分直播）

曼聯前任教頭莫耶斯曾創造出「九九八十一斬」嘅「燒味戰術」，畀人笑到面都黃，現任領隊尹戈爾一向自大，梗係不屑用呢招，但上周中英足盃第4圈重賽迎戰劍橋聯，尹帥忽然堅抄「莫天才」嗰套，搵咗高佬防中費蘭尼串演中鋒，不斷斬高波畀「爆炸頭」喺禁區去撞去撼，桑馬達先開紀錄嗰球就係靠佢頭槌助攻，最終輕取3比0晉級，尹帥又轉移視線，大讚依家無論打三後衞或四人防線都咁掂，抄人戰術仲自我感覺良好，面皮成尺厚。
錘仔幫近排勁旺半和

不過一山還有一山高，講到呢種傳統英式傳中戰術，韋斯咸領隊艾拿戴斯先係專家，「大Sam」執教保頓嗰陣，就係用呢招搞到阿仙奴等技術型球隊一戙都冇，遇到同類球隊更加冇有怕，好多球評家大彈呢種戰術已Out Out哋，但喺強調身體碰撞嘅英超仍有作為，尤其係對於一啲中游球隊，「大Sam」幫韋斯咸注入呢種元素，簽入達寧同馬菲查維斯等典型翼鋒，甚至連廢柴柱躉式中鋒安祖卡路爾都獲得重生，加埋安拿華倫西亞等快速前鋒，令「錘仔幫」所用嗰套比「九九八十一斬」層次更高。

如今曼聯想用同一家波對付韋斯咸，絕對係棋差一着，隨時令今仗處於拉鋸局面。睇番「錘仔幫」近七場正式比賽，有六仗開半場和，咁蹺曼聯近五仗作客全開半場和，既然咁旺不妨追多鋪。