紅軍搶宮博首球

猪拉多纳

一為晉級二為報仇

今晚英格蘭足總盃16強壓軸戰，由水晶宮坐鎮主場硬撼利物浦，水晶宮上季尾曾經喺主場戲劇性逼和紅軍，粉碎其首奪英超美夢，另外主帥柏杜更係25年前水晶宮淘汰利物浦，殺入足總盃決賽嘅英雄，新仇舊恨交織下，紅軍為咗出番啖氣，一開波必定搶攻，因此斯維今刁鑽啲捧利物浦第一隊入球。

（now 621及633周日凌晨1時30分直播）
水晶宮防線唔夠集中

唔好以為利物浦近況回穩就以為佢哋可以秤先，事實上佢哋近年對親水晶宮都冇乜甜頭，尤其作客去到史靴斯公園球場，已經整整18年未贏過。令年輕一輩嘅利粉印象最深嘅當然係上季季尾喺呢度領先3粒巨大優勢下，末段大崩潰，慘遭逼和3比3，令佢哋首奪英超冠軍美夢宣告幻滅，已離隊嘅蘇亞雷斯賽後喊晒口一幕依然歷歷在目。另外唔講你未必知，其實中途接手水晶宮嘅主帥柏杜不但係該隊名宿，喺1990年足總盃準決賽，正正係憑住佢嘅入波，協助水晶宮爆大冷以4比3擊敗當時不可一世嘅利物浦（決賽不敵曼聯），如今足總盃再遇，可謂仇人見面分外眼紅。

踢波嘅嘢一場還一場，水晶宮依家首要任務係護級，盃賽方面只係盡力而為，今仗三線主力史葛丹恩、積甸拿克、謝路美湯馬士、耶耶辛洛高都未好番，整體戰鬥力有所削弱。仲有一樣值得留意就係自從柏杜1月上任後，水晶宮雖有復甦之勢，但連盃賽一共踢咗7場波，竟然有5仗係先失守，就算當中有4場追和或反勝，亦睇得出佢哋防線有唔集中嘅毛病。
誓破18年作客不勝魔咒

儘管利物浦有隊長謝拉特、史達寧同盧卡斯3大主力缺陣，加上作客水晶宮住績唔靚，要贏波並唔容易。但考慮到利記今季只剩下英足盃同歐霸仲有得爭，而歐霸強手林立且變數多，奪標難度極高，反而英足盃因幾支大熱門都已經倒灶出局，紅軍已視之為重中之重，爭勝決心唔使懷疑，加埋傷愈復出嘅前鋒史杜列治逐漸上力，要打破18年來於史靴斯公園球場嘅不勝魔咒唔係冇機會，初段必以獅子搏兔之勢搶攻，相信水晶宮好難頂得住，不妨博紅軍1.61倍嘅第一隊入球。