紅軍情人節進宮食檸檬

猪拉多纳

一支公史達寧帶o靚仔搵食

利物浦新星史達寧日前被爆追女星Tulisa，點知畀對方嫌棄佢得嗰廿歲成個細路仔咁款，最後慘食檸檬，今日情人節注定一支公過。不過史達寧食檸檬，利物浦都唔好過，今晚紅軍喺英格蘭足總盃第5圈作客水晶宮，「神奇隊長」謝拉特受傷缺陣，要靠班o靚仔落場搏殺，今場隨時再畀主隊水晶宮「請食檸檬」，梗係捧1.84倍「讓主」！

謝拉特上場聯賽鬥熱刺拉傷腿筋，今晚踢唔到不特止，嚟緊佢仲會缺陣歐霸盃鬥比錫達斯嘅兩回合賽事，同埋對修咸頓、曼城兩場非常關鍵嘅英超大戰。雖然「謝四」已經成34歲，但仍然寶刀未老，今季喺各項賽事為紅軍貢獻10球，今晚冇咗呢位首席射手孭飛，紅軍火力隨時大打折扣！
「士哥拿」謝四打柴 水晶宮查馬克復出當弗

再講吖，另一前線猛將史杜列治最近至傷愈復出，上場鬥熱刺正選掛帥表現一般，經驗豐富嘅防中盧卡斯又因傷要抖成個月，今場搵佐敦伊比呢啲o靚仔孭飛，容乜易好似史達寧追女仔咁食檸檬o架！

另邊廂，新帥柏杜接掌水晶宮後連贏4場，雖然近兩戰主場先後不敵愛華頓同摸和紐卡素，不過表現絕對唔差。況且早前傷愈復出嘅摩洛哥中鋒查馬克，上圈作客修咸頓梅開二度，狀態同前線拍檔杜韋加爾一樣弗到漏，今場喺自己地頭出戰有力同利物浦周旋，有得受讓梗係撐「讓主」啦！

（足總盃第5圈now621、633周日凌晨1:30直播）
盤路解碼

兩軍近6次對戰開出5口入球大，大盤率達83%。
Data King：水晶宮主場交手6戰不敗

‧水晶宮連續6次主場鬥利物浦未輸過。

‧利物浦連續15場不敗。

‧水晶宮對上3次主場鬥紅軍，至少攻入對手2球。
乜都玩錦囊：水晶宮唔縮玩「大」佢

利物浦近期個勢超順，除咗箭頭史達寧同史杜列治識入波，就連巴洛迪利上仗亦攻入今季首個聯賽士哥。進攻唔使愁，不過防守似乎有隱憂，防中盧卡斯缺陣後紅軍遭遇熱刺即失2粒，咪忘記水晶宮近年主場對紅軍唔會縮，仲連續3次至少攻破紅軍大門2次，1.92倍入球大不妨一試。