複製寸王救米堡 藍3間諜登場

猪拉多纳

阿仙奴今晚喺英格蘭足總盃16強主場對米杜士堡，將上演《倫敦特工》大戰！大家咪以為米堡踢英冠好流，實情佢哋嘅領隊卡蘭卡跟過莫連奴，被球迷封為「寸王複製版」，佢仲借咗3個車路士球員做倫敦間諜，兵工廠要小心對手嘅「特工武器」！

上季阿仙奴拎到足總盃冠軍，結束長達9年錦標荒，過程飽食驚風散。今季廠迷都唔可以放鬆。特別係兵工廠最近氣勢回落，領隊雲格再次被圍插，仲要面臨「倫敦特工」嘅正面挑戰，因為對手米堡領隊卡蘭卡，射手班福特、中堅奧美魯奧同右閘卡拉斯，全部同佢哋個倫敦死對頭車路士有關。
卡蘭卡師承莫連奴

現年41歲嘅卡蘭卡唔算出名，但球員時代為皇家馬德里贏過唔少獎盃，08年展開執教生涯帶領西班牙U16，兩年後得到莫連奴提攜，重返皇馬出任助教，學晒所有寸王領軍哲學。結果佢前年中途接手執教米杜士堡，領軍由護級殺番上中游，今季更神奇大爆發，帶挈米堡現時以1分優勢進佔榜首！
車仔借將幫手爭升班

事實上，卡蘭卡同莫連奴的確有交情，原本米堡已經借咗班福特同奧美魯奧幫手，上個月仲加碼借埋卡拉斯爭升班，當中班福特更加係米堡上一圈作客以2:0淘汰曼城先開紀錄嘅功臣，如果卡蘭卡唔係有「寸王背景」，車仔真係識佢條鐵。阿仙奴遇正呢班「倫敦特工」，睇怕要當打吡戰嚟踢，否則又有排驚。