馬體會贏兩粒 Easy執

猪拉多纳

切爾達近3個月得一W

今晚西甲切爾達主場恭候馬德里體育會。切爾達季初係威係勢，試過作客擊敗巴塞隆拿，弊在佢哋之後無以為繼，近3個月聯賽就贏得1場咁大把，狀態相當一般。另邊廂嘅馬體會就唔同喇，啱啱喺「馬德里打吡」大炒皇馬，士氣同信心達到巔峰，今輪就算作客出擊都信得過，3.7倍「讓球客勝」屬心水之選。

（廣東體育周一凌晨4:00直播）
切爾達拉里維3個月冇波入

切爾達今季開咧嗰陣頭威頭勢，作客摸和過馬體會之餘，造訪魯營更爆大冷擊敗巴塞隆拿，一度殺上聯賽榜前5名。不過今時唔同往日喇，切爾達近12輪聯賽淨係贏過科爾多瓦，其餘11場3和8負曳到爆，排名滑落到第10位，冇計啦，佢哋條鋒線冇季初咁醒神，首席射手之一嘅拉里維仲正值入球荒，已經成3個月喺聯賽食白果喇！
三大前鋒勁合拍

相反，馬體會前鋒文迪蘇傑同「王子」費蘭度托利斯當弗，無論邊個夥拍今季大熟大勇嘅基沙文，攻擊力都咁強勁。

仲有呀，文迪蘇傑喺上場打吡戰頭槌建功，正正係「王子」交個靚助攻，證明兩者夾得嚟，對教頭施蒙尼而言，絕對係幸福嘅煩惱。雖然中場佐治高基喺打吡戰傷出，今場肯定唔踢得，不過上場入替佢嘅沙奧尼古斯以一記倒掛金鈎收死卡斯拿斯功架十足，真係前途無限。「床單兵團」士氣爆燈，作客要贏切爾達兩粒話咁易！