富力1,250萬獎金求突圍

猪拉多纳

亞冠盃第三圈外圍賽今日開波，採取淘汰賽一戰定生死，16路大軍爭奪八個分組賽席位！呢項亞洲版「歐聯」，星味與財氣十足，唔少球會引入名帥球星助陣，提升爭標實力。中超球隊廣州富力（馬會譯：廣州ＲＦ）今年聘請羅馬尼亞名宿高士曼干查執教，上圈領軍輕鬆晉級，盡顯功架。賽前老闆張力表明加碼獎金，今仗出線獎金達1千萬人民幣（約1,250萬港元），大大振奮軍心，今仗作客澳職中岸水手，富力仲有得受讓，必捧讓球客勝。

（now 671周二下午4時30分直播）

廣州富力上季獲得中超季軍，會方並未滿足，炒咗名帥艾歷臣，改由高士曼干查接手，呢位39歲少帥球員時代曾効力ＡＣ米蘭、馬體會、西布朗、基達菲等著名球會，上季臨危受命接掌基達菲帥印，協助球隊護級成功。高士曼干查亦帶領富力上圈亞冠盃以3比0大勝新加坡球隊ＦＣ勇士，可見佢已迅速摸清球隊底細。
米歇爾加盟組織力提升

富力陣中不乏猛將，包括兩位南韓國腳朴鍾佑、張賢秀，以及剛加盟嘅西班牙中場米歇爾；佢曾効力華倫西亞、利雲特、基達菲等西甲球隊，擁有不俗腳法，其加盟有助提升球隊中場組織力。富力非常重視亞冠盃，老闆張力日前講明會增加獎金，希望球隊一鼓作氣打入分組賽，不讓同市球隊廣州恒大淘寶專美。

至於中岸水手今季演出長期低迷，連盃賽在內，曾一度連續十三場不勝，未踢已經先輸氣勢。水手上屆亞冠盃分組賽出局，以現時頹勢，恐怕連外圍賽都無力突圍。