拜仁洛賓弗爆 大薩四方

猪拉多纳

歐聯今晚重燃戰火，德甲「一哥」拜仁慕尼黑造訪烏克蘭勁旅薩克達，進行16強首回合大戰。拜仁出戰歐聯淘汰賽前喺聯賽大炒漢堡8:0，士氣大振，對主帥哥迪奧拿嚟講絕對係好消息，今晚就算作客薩克達一樣有條件反客為主，加上對方名為主場實質搬咗去利沃夫踢，一於撐拜仁1.95倍「讓客」。

（有線62及202周三凌晨3:45直播）

雖然拜仁喺歇冬後先畀禾夫斯堡大炒1:4，又喺主場被史浩克逼和1:1。不過，經過呢兩場熱身，拜仁已回復班霸本色，近兩仗全勝兼一球不失，仲要攻入10球，日前佢哋喺聯賽血洗漢堡，湯馬士梅拿、馬里奧葛斯同洛賓分別每人省兩粒，加埋列貝利同利雲度夫斯基各入1球，製造8:0嘅大勝。
腳風順近9場入8粒

仲有呀，拜仁喺聯賽有8分優勢，根本唔需要擔心留力問題，今晚一定會精銳盡出，務求攞領先優勢帶落次回合，特別係洛賓近期弗到漏油，個人近9場攻入8球，就連拜仁大佬之一嘅舒韋恩史迪加，都要喺對漢堡嘅比賽，作狀為洛賓擦鞋慶祝入球呀！
薩克達未開咧冇態

薩克達近幾年係歐聯常客，但係隨住主力畀歐洲豪門挖角，兼主場由頓涅茨克搬咗去利沃夫逃避戰火，戰力確實有所減弱。今屆能夠突破分組賽，某程度多得同組有魚腩巴迪同歐聯新丁畢爾包。況且烏克蘭聯賽歇完冬尚未開咧，薩克達狀態唔慌好得去邊，同時防守中場史堤巴蘭高又要停賽，今晚對住爭標熱門嘅拜仁，真係凶多吉少。
盤路解碼

拜仁今季作客16戰錄得10勝3和3負，勝率達62.5%。
Data King：薩克達對德甲球隊旺開和

‧薩克達近4次主場對德甲球隊得3和1負。

‧拜仁近4次作客烏克蘭球隊得1和3負。

‧拜仁連續4場開角球細。
乜都玩錦囊：拜仁撻着可諗半場W

雖然烏克蘭天寒地凍，但拜仁近排已經撻番着，而且10場正式比賽有8次半場不失，換句話講，只要拜仁上半場有波入，就好大機會領先返更衣室。如果大家怕「讓客」唔穩陣，拜仁半場勝都值得考慮。