富力抄橋撼水手博半和

猪拉多纳

橋唔怕舊，最緊要受？廣州富力（足智彩譯廣州RF）今午喺亞冠盃外圍賽作客悉尼，挑戰澳職下游球隊中岸水手，呢支中超上屆季軍唔止懸賞1,000萬人仔爭晉級，仲刻意抄恒大舊橋，整咗張「驚濤拍岸」宣傳海報（上圖），似乎想複製恒大嘅贏波歷史，但係由現實環境去睇，博2.03倍半場和應該係最實際。

（now671台周二下午4:30直播）
懸賞千萬人仔爭晉級

富力、水手今日邊隊Win出，就可以躋身亞冠盃正賽，同日本大阪飛腳、南韓城南一和、泰國武里南聯爭逐F組出線權。論亞冠經驗，水手肯定豐富過富力，而且呢班波不嬲唔赦中超球隊，2012年佢哋主場5:1打爆天津泰達，13年主客場都贏貴州人和2:1，14年主場1:0險勝北京國安、唯獨一次輸波，就係13年主場1:2不敵廣州恒大。富力班職員可能記得當年恒大張海報就係用「驚濤拍岸」做主題，今次除咗重賞千萬仲不惜「侵權」照抄，顯然係想第一次打入亞冠盃正賽。

不過，打波係靠腳頭唔係意頭，入唔到波乜都唔使諗。富力改咗由前基達菲主帥高士曼干查執教之後，着力改善防守，陣式由艾歷臣時代嘅「4-4-2」，變咗「4-2-3-1」同「4-1-2-2-1」之間，中場屯兵更重，但係上星期3:0淘汰新加坡勇士場波，富力都要擺無鋒陣，高士曼干查亦坦承隊波前線把握力不足，依家外邊都一直傳聞，富力斟緊科特迪瓦個U20前鋒奎斯。

攻擊力未如理想，至弊係水手嗰陣體力化打法，向來都係富力至驚嗰隻，而且水手後衞保斯拿前年効力過富力，對呢班波好清楚，有埋地利嘅水手，雖然走咗唔少主將，富力一開波都未必敢亂咁攻，博「半和」啦。