史浩克鐵桶抗艦隊

猪拉多纳

迪馬堤奧再演意式守本戲

歐聯16強首回合史浩克04主場對上屆冠軍皇家馬德里，充滿意式風情，兩位意大利籍教練迪馬堤奧、安察洛堤正面交鋒！論資歷同戰績，迪帥的確唔及前輩肥安，但迪馬堤奧內藏意國防守基因，3年前靠一個守字， 率領車路士勇奪歐聯冠軍，有辦你睇，即使依家執教史浩克亦可照辦煮碗，再施「守」術堵塞「銀河艦隊」，博史浩克04「+1」有着數。

（有線61台及201台周四凌晨3時45分直播）

迪馬堤奧上年10月接手執教史浩克，令球隊起死回生，重返德甲前4，情況同佢3年前臨危受命，坐正車仔帥位情況好相似。呢位44歲少帥當年以穩守戰術，於歐聯4強淘汰巴塞，決賽再守足拜仁慕尼黑120分，靠互射12碼捧盃。無可否認，呢種消極踢法並唔好睇，但事實證明可以剋制進攻型班霸，相信迪馬堤奧定會重施故技。
皇馬作客德甲兵僅3勝

事實上，史浩克04今仗唔失波，令皇馬攞唔到作客入球，已經有着數，因為次回合去到馬德里比賽，若能偷襲得手入到波，作客入球優惠賽制下，入1球等於「1.5球」，屆時壓力就會喺晒皇馬身上。史軍今場冇必要同對手鬥攻，專心做好防守已足夠。況且皇馬史上27次作客德甲球隊只曾3勝，連心理上都佔優，史浩克要摸和甚至贏波都絕不出奇。
C朗當黑成個月冇波入

皇馬踏入2015年後，氣勢大減，特別係C朗頭頭碰着黑，同伊蓮娜分手，跟住西甲踢對手，被罰停賽兩場，最大鑊係腳頭無靈，已經有成個月冇波入。「銀河艦隊」另一個問題係受傷兵困擾，一對中堅沙治奧拉莫斯、比比有傷，防守中場基迪拉、莫迪歷亦缺陣。攻守人腳受削，情況更難樂觀。