西維爾慕遜做大騷賀年

猪拉多纳

今日大年初一，祝各位身體健康、波運亨通贏大錢，家肥屋潤喜氣洋洋。今晚歐霸盃32強首回合開打，由衞冕嘅西維爾主場迎戰德甲勁旅慕遜加柏。論實力嚟計，兩軍都有能力捧盃，況且擁有強大火力，肯定會鬥攻演入球騷賀中國新年，一於撐1.85倍入球大，齊齊攞頭彩！

（有線63、廣東體育周五凌晨4:05直播）
西維爾12戰轟25球

西維爾上屆捧走歐霸盃，佢哋嘅高效率穩守突擊戰術令人印象深刻。射手卡路士巴卡、迪路菲奧同加美路火力強勁，佢哋近12場歐洲賽主場比賽狂轟25球，平均每場入超過2球，嗰團火咁猛，今場又點會突然啞火先？更何況呢班波好擅長踢呢個盃賽，睇佢仲曾經係06年、07年同上年嘅冠軍就知！

另邊廂嘅慕遜加柏，有麥斯古斯、靴爾文等星級攻擊好手，大踢進攻足球。佢哋今屆歐霸盃踢咗8場入咗24球，平均每場有3球進帳，好高產o架！仲有，佢哋喺分組賽嗰陣作客同維拉利爾踢成2:2，有晒對西甲球隊經驗，何況班波從未染指過歐霸盃，為捧盃唔搏盡等幾時？一於強攻拎多幾個作客入球，下仗返主場就好踢好多啦！
頂占筍盤：西維爾（入球大）