獅吼保6大吉大利

猪拉多纳

今日係大年初二，科娜喺度祝各位東方波經讀者財運亨通，買咩贏咩！今日晏晝有場澳職直播賽事，布里斯班獅吼主場對墨爾本勝利，獅吼近期為爭奪季後賽資格全面發力，近3場全勝，今場對住排名更高嘅勝利都未驚過喇，最緊要係獅吼對賽往績食住對手，平手盤一於要獅吼！

（有線64及203台周五下午5時直播）
勝利作客腳仔軟

喺澳職排緊第6嘅獅吼只係Lead緊第7嘅墨爾本城1分，再冇失分空間，獅吼係上季嘅澳職總冠軍，如果今季連季後賽資格都攞唔到，點同班球迷交代呀？獅吼今場雖有鋒將桑蘇拿辛奴缺陣，不過好在有球隊神射手軒歷基安達迪及時復出，對住作客防守力弱、近兩場作客均失3球嘅勝利，睇嚟又係安達迪起筷嘅時候！

勝利之所以能夠排喺榜內第2位，主要係靠主場攞分，作客踢咗8場只係贏咗兩場咁大把，而且對賽往績亦輸蝕，近6次作客獅吼都未贏過，其中5場仲要輸埋。獅吼喺靚績支持下，球員未開波心理已佔優，平手盤獅吼坐和望贏，冇理由唔捧呀？