紅魔難嗒天鵝追半和

猪拉多纳

尹帥固執唔識轉風車

今日年初三「赤口」唔啱去拜年，好多人會選擇去車公廟買風車轉運，其實曼聯領隊尹戈爾都好應該買番個風車嚟轉吓運，順便清醒一吓頭腦，轉一轉球隊嘅踢法，咪再使出「燒味戰術」，不過剛愎自用嘅尹帥又點會聽人講呀！「紅魔鬼」今晚英超會作客「天鵝」史雲斯，以紅魔近期嘅表現，好難半場就食到「天鵝肉」，科娜力捧半場和！

（now 621周六晚11時直播）

趁住新正頭，科娜今次都同各位分析一吓羊年運程，唔少堪輿學家就話今年屬牛嘅朋友犯太歲，運勢麻麻，而曼聯隊長朗尼就係屬牛，難怪佢今年表現咁曳啦，啱啱喺英足盃16強對住甲組仔普雷斯頓，竟然要靠插水博12碼嚟打破952分鐘入球荒，睇嚟紅魔今場都唔使旨意靠佢贏波。
「斬料踢法」不倫不類

至於師傅話屬兔嘅朋友事業運唔算特別好，好似都幾準喎，因為屬兔嘅尹戈爾領軍曼聯都有唔少阻滯，先有傷兵問題，到近期傷疲盡起，成班球星總係踢極唔起，睇成績曼聯近排係唔錯呀，不過實際表現就好曳，冇一場勝仗係贏得有說服力。仲記得尹帥上年帶荷蘭出征巴西世界盃都不知幾威，畀人封為「戰術大師」，點知嚟到曼聯變咗「斬料師傅」，搞到紅魔變咗隊「長傳隊」，真係睇到「魔粉」火都嚟！雖然畀外界圍插，但尹帥仍然我行我素，搞到曼聯不倫不類，再咁落去尹帥事業運只會直插谷底嘅喎！

史雲斯今場有大將基菲爾施古臣刑滿復出，呢位屬蛇嘅朋友今年運勢唔錯，事業上有機會發揮所長，唔通今場對曼聯就係佢發威好時機？不過「天鵝」冇咗首席射手韋菲特邦尼後攻力大減，領隊蒙克但求隊波穩陣行先，費事失波後追唔番。曼聯近7作客全開半和，梗係要再追喇！