阿仙奴發力反轉水晶宮

猪拉多纳

今日大年初三，先同大家拜個年，祝各位讀者波運亨通，身體健康。羊年第一擊推介阿仙奴。英超已完成接近三分二比賽，歐聯入場券之爭亦進入白熱化階段，樂比認為車仔及曼城可穩奪其二，餘下兩個席位由曼聯、修咸頓、阿仙奴、熱刺及利物浦爭逐，樂比最睇好「兵工廠」，今場佢哋作客水晶宮，熱捧1.64倍客W。

（now623台周六晚11:00直播）。
兵工廠換門將防線穩

今季前四之爭前所未有咁激烈，第3至第7位距離只有5分。阿仙奴近年「搶4」駕輕就熟，佢哋過去9季有6季排第4，另外3季排第3，而且好多時都係後來居上，所以樂比認為依家排緊第5嘅阿仙奴，係時候嚟個大爆發。再者，阿仙奴季初表現欠佳係因為傷兵太多及防線不穩，但近期傷兵已陸續復出，門將改由奧斯賓拿把關亦予人一定信心，睇番阿仙奴近8戰贏咗7場，平均每場入2.5球，最難得係有5場保持清白身，可見阿仙奴目前確實處於全季最佳狀態。

水晶宮自從改由柏杜任教後，成績突飛猛進，頭6場賽事贏咗5場，但近兩仗主場已贏唔到，相信「蜜月期」已過，畢竟水晶宮最大目標只係留喺英超，連場搶分後有所鬆懈好正常，捧客W啱數。
樂比推介：阿仙奴（客勝）