利物浦上盤抵錫

猪拉多纳

重臨伊斯坦布爾福地

10年前嘅伊斯坦布爾奇迹之夜，相信球迷依然記憶猶新，當年嘅奇迹創造者利物浦，今晚會喺歐霸盃32強次回合造訪比錫達斯，又係嚟番呢個奪冠福地，相信「紅軍」肯定想重溫好夢。利物浦呢期重新起飛，佐敦伊比、史達寧同菲臘比古天奴3隻生牯仔又當Fit，讓防線甩皮甩骨嘅比錫達斯平半，梗係要撐1.95倍上盤啦！

（有線61及201周五凌晨2:00直播）

利物浦最近強勢沒法擋，最近19場波只曾一敗，對上10場英超更加未輸過，證明冇咗「神奇隊長」謝拉特都冇問題。「紅軍」唔聲唔聲彈番上英超前列，重燃爭入前四希望，全隊上下當然個個心雄。首回合Lead住1粒嘅利物浦，今晚有翼鋒拿沙馬高域停賽，不過呢位塞爾維亞國腳狀態麻麻，預計領隊羅渣士搵番史杜列治擔正，侵略性仲強。
比錫達斯丹巴巴亞或倦勤

查實「紅軍」呢期走勢咁好，3隻矮腳虎佐敦伊比、史達寧同菲臘比古天奴好大功勞，啱啱上位嘅伊比能傳擅射又爆得，史達寧就可翼可鋒，加埋個腳法細膩兼有遠射腳頭嘅古天奴，利物浦嘅攻勢都幾難頂。

10年前利物浦就係喺伊斯坦布爾個阿塔圖爾克球場上演奇迹，落後3球反勝AC米蘭捧走歐聯錦標，咁啱得咁蹺，比錫達斯個新球場未Ready，家陣暫時用住阿塔圖爾克球場，睇嚟連個天都想利物浦喺度贏多鋪！呢個場可以容納7.6萬人，比錫達斯為壯聲威，特登將今仗波飛標價10鎊益街坊。可惜吖，佢哋個首席射手丹巴巴亞小腿受傷，今仗未必披甲，左閘拉蒙莫達同中堅阿辛古林就要坐波監，加埋頭號門將杜加辛堅又養緊傷，天殘地缺點同「紅軍」鍊？
盤路解碼

利物浦今季讓球11勝8負。
Data King：兩隊近戰旺半場細

‧利物浦曾經喺07年嘅歐聯分組賽大炒比錫達斯8:0。

‧比錫達斯近6場比賽未曾半場領先。

‧雙方近8仗都有7場開半場細。
乜都玩錦囊：比錫達斯難破門吼細

話就話利物浦領隊羅渣士最近鍾意打3個後衞，但防線表現絕對唔失禮，最近7仗只係失咗4球，鋒力麻麻嘅比錫達斯睇怕都好難搵到食，捧1.73倍入球細。