人在英倫等睇決賽

猪拉多纳

阿仙奴於日前歐聯16強首回合，竟在主場以1比3輸畀法甲摩納哥，出線前景渺茫，主帥雲格為歐洲賽經驗最豐富嘅英超領隊，可惜從未嘗過最崇高嘅歐聯冠軍滋味，令佢難與費格遜、莫連奴、安察洛堤等名帥睇齊。相反，阿仙奴嘅倫敦死敵車路士，於上周歐聯作客法甲豪門聖日耳門被圍攻嘅劣勢之下，最終以1比1全身而退兼攞到一個作客入球在手，只要次回合返主場悶和0比0便可晉級，再次證明車仔主帥莫連奴係最擅玩歐聯兩回合淘汰賽嘅專家。
今夜英超捧熱唔扒冷

講番今晚6場英超大戰，包括韋斯咸主場對水晶宮、曼聯主場對新特蘭、史篤城主場對侯城等，大部分都係主隊稍佔優勢，所以奉勸大家無謂刻意扒冷。至於本周有80多名香港球迷會跟隨包括Peter在內嘅評述員所率領嘅英倫睇波團，去到英國欣賞英超或英格蘭聯賽盃決賽。

Peter執筆之時已經人在英倫，明天就會親赴倫敦溫布萊球場，現場欣賞呢場香港時間周一凌晨嘅車路士大戰熱刺嘅冠軍戰，賽前八到有乜猛料，Peter會喺倫敦第一時間來料畀香港讀者，記得留意明天我嘅專欄啦！

金句：不到長城非好漢，未攞歐聯是中庸。