歐洲浮華宴

猪拉多纳

紅軍曼城入球騷冧fans

英西法豪門激鬥擺浮華宴！英超曼城作客利物浦，一隊力爭衞冕，一隊要入前4，絕冇退讓空間。西甲爆發「海戰」，由「銀河艦隊」皇馬火併「黃色潛艇」維拉利爾，勢必火花四濺。法甲摩納哥冇咗財氣，但踢爭氣波，遇上富貴大軍巴黎聖日耳門，搶錢搶分，亦要搏到盡。

今晚雖然上演英聯盃決賽，但英超早場都有重頭戲，就係利物浦主場對曼城。「藍月亮」剛喺歐聯輸波而回，谷埋一肚火就算作客都肯定會主動搶攻，但「紅軍」近期狀態其實唔差，加上啱啱喺歐霸盃射輸12碼出局，球隊返到主場肯定想贏波冧番啲fans，相信會踢得非常進取，而且兩隊近年對碰都出現唔少入波，今仗隨時再次合演「入球騷」，阿謙一於捧大盤。

（now 621周日晚上8時直播）

曼城上周中喺歐聯16強首回合主場鬥巴塞隆拿，球隊喺踢少一個嘅情況下最終輸1比2，出線機會變得唔太樂觀。事實上，如非曼城門將赫特喺賽事尾段救出美斯嘅十二碼，「藍月亮」情況可能更惡劣。一眾曼城球員自然對呢個賽果唔多滿意，好希望喺球迷面前踢番場好波挽回面子，今仗作客晏菲路都會主動搶攻，力求爭取勝利。

利物浦啱啱作客射輸12碼畀土耳其嘅比錫達斯宣布緣盡歐霸盃，但球隊表現其實唔差，只係運氣唔太好。「紅軍」前線球員好似菲臘比古天奴、史達寧、史杜列治、拉爾拉拿甚至巴洛迪利近期都有波入，加上盛傳「神奇隊長」謝拉特今仗有可能復出，喺一連串利好消息下，一眾球員自然想踢番場好波一掃歐霸盃提早出局嘅陰霾，相信可以對「藍月亮」構成重大威脅。
兩軍6次交鋒全開大

其實，曼城與利物浦呢個對碰一向都唔少入波，兩隊對上6次交手皆開出大盤，而「紅軍」近5次主場對「藍月亮」亦有4次開出入球大，可見呢兩班波碰頭，一眾球員都會全力以赴爭取入球，所以阿謙認為今仗入球大係不二之選。