艦隊鬥潛艇大駁火

猪拉多纳

近期飽受「開P事件」困擾嘅C朗終於知衰，向皇馬會長皮里茲認錯，並寫包單，豪言要為「銀河艦隊」捧今季西甲及歐聯冠軍，鬥志高昂，準備好數胡，兌現諾言。中場莫迪歷已經傷愈，有望復出，人腳更加完整，主場出擊勢必同「黃色潛艇」維拉利爾駁火，大細中位數3.5球，照要入球大。

（now 632周一凌晨4時直播）
C朗要數胡向皮里茲陪罪

皮里茲日前去探班睇球隊操練，C朗主動向佢老人家道歉，承認自己有犯錯，但有信心好快重拾巔峰水準，一定搏命為皇馬捧西甲及歐聯冠軍。C朗一向心高氣傲，既然許下承諾，必然要兌現，否則又成為笑柄，預料佢今仗會使出渾身解數，證明自己講得出做得到。

皇馬另一個好消息係養傷多時嘅莫迪歷已經可以候命，令教練安察洛堤有更多調動選擇，至於有輕傷嘅加里夫巴利亦冇大礙，可以上陣搏殺，中前場火力充裕。

維拉利爾擁有新冒起嘅射手韋圖，呢位阿根廷小將今季西甲已有11球進帳，上仗歐霸盃亦梅開二度。「黃色潛艇」對豪門並不畏縮，早前聯賽作客巴塞，照同對手鬥攻，僅輸2比3，其後西班牙盃又同巴塞合力炮製4個入球。皇馬防線一向唔穩陣，維拉利爾入波機會樂觀。