倫敦打吡對決 車仔大戰熱刺

猪拉多纳

「倫敦雙雄」決戰聯賽盃之顛！車路士今晚同熱刺喺溫布萊爭逐聯賽盃冠軍，熱刺大紅人哈利卡尼呢期着晒火，加埋細細個已經畀車仔請食檸檬嘅基斯甸艾歷臣攻堅，缺少「掃把佬」尼曼查馬迪嘅車路士都咪話唔危。既然車仔領隊莫連奴講明要報番年頭輸畀熱刺3:5之仇，迪亞高哥斯達同夏薩特實搏晒命，今場梗係捧1.82倍大啦！
「孱仔」艾歷臣證身價　

熱刺啱啱喺歐霸盃不敵費倫天拿出局，疊埋心水爭聯賽盃，雖然牌面上唔及車路士，但咪忘記佢哋1月頭曾經喺英超以5:3大勝「藍戰士」，全隊上下當然想食過翻尋味。嗰場波梅開二度兼有兩次助攻嘅哈利卡尼，近6場波喪入6球，當中有兩球係比賽最後10分鐘入，堪稱熱刺「救世主」，今晚隨時又係呢位「準三獅兵」Show Time。

至於丹麥中場基斯甸艾歷臣，賽前就自爆咗單陳年往事，話佢喺14歲嗰陣有機會加盟車仔，但對方就嫌艾歷臣太孱弱唔要佢。艾歷臣家陣喺英超揚名立萬，今鋪肯定趁機會報仇，向「藍戰士」證明佢哋走寶！
車仔防中馬迪停賽

睇番另一邊，車路士今仗有約翰米基爾養傷，不過最大劑就係尼曼查馬迪停賽，呢位鐵血防中平時掃走勁多波，為防線減輕唔小壓力，冇咗佢對車仔防守力肯定大受影響。不過「藍戰士」身為英超「一哥」，後面嘅漏洞梗有方法憑超強火力彌補，迪亞高哥斯達同夏薩特一個射得，一個扭得，加埋個超級右閘伊雲洛域已經連續兩仗有士哥，呢場「倫敦打吡決戰」實大把波入！

（周一凌晨0:00 TVB301直播）
盤路解碼

車路士今季大細比率係26場大（54%）、22場細（46%）。
Data King：車仔交手例先入波

‧兩軍近6次交手，車路士取得3勝2和1負。

‧雙方近5次比賽開出3口半場大。

‧兩軍近6次對碰，藍戰士5次開出第一隊入球。
乜都玩錦囊：車仔體力佔優撐上盤

車路士戰將始終大戰經驗豐富，周中又冇歐聯踢，體能點都比早兩日先喺歐霸盃造訪完費倫天拿嘅熱刺秤先，「藍戰士」讓半一，1.84倍上盤捧得過。