西維爾馬體會鬥數胡

猪拉多纳

今晚西甲有2支同樣由德國返歸嘅歐戰勁旅對碰，西維爾主場迎戰「3哥」馬德里體育會。佢哋周中遠征德國命運迥異，西維爾砌低慕遜加柏躋身歐霸盃16強；相反，馬體會就喺歐聯16強首回合不敵利華古遜，雖然馬體會實力較高，但連續兩場作客體力輸蝕，今晚勝負難料，不如轉玩2.19倍入球大仲好。

（now632台周一凌晨2:00直播）
西維爾爭前4焗搶攻

西維爾喺上輪聯賽作客皇蘇，竟然臨天光連環失守輸3:4，家陣已經落後第4位嘅華倫西亞5分，爭歐聯入場券形勢落入下風，之後每場波唔攻唔掂，就算呢鋪鬥馬體會都唔慌會踢得保守。況且箭頭卡路士巴卡狀態勁弗，近4場波入3粒，中場馬捷恩佩雷斯對慕遜加柏亦梅開二度，計落有一拚之力。如果要搵西維爾嘅弱點，就係佢哋條防線實在太曳，唔計今輪聯賽，齋計西甲前8隊，佢哋失波係最多嗰隊，最近2仗仲狂失6球，與其死守不如豁出去駁火仲有着數！

另邊廂，馬體會嘅表現亦不及上季，去到客場嗰陣班波集中力仲差，搞到近6次客戰輸4鋪，好在條鋒線仲保持到效率，一對拍檔法國國腳基沙文及文迪蘇傑，合共交出26個聯賽士哥，加埋季中回巢復勇嘅「王子」費蘭度托利斯，火力唔講得笑，既然兩軍同樣攻強守弱，點計入波都唔會少啦！